Cahiliyyə dövrü ədəbi nümunələrində tərbiyə və öyüd – nəsihət məsələləri barədə qısa da olsa bir fikir söyləyərkən qeyd etmək lazımdır ki, çətin səhra şəraitində yaşayıb, sərtləşən qədim ərəblər zəngin bir hikmət xəzinəsi yaradan xalqlardan olmuşdur. Özlərinin ağır həyat təcrübələrinə istinad edərək həyatın müxtəlif aspektlərinə lakonik və sərrast münasibətlər bildirən xütbələr, aforizmlər və tərbiyəvi xarakterli nəsr nümunələri qoyub getmişlər. Bu nümunələrin biri barədə Bakı Dövlət Universiteti İlahiyyat fakültəsinin elmi məcmuəsinin dekabr 2011-ci il 16 sayında cahilliyə dövrünün ən böyük qəbilələrindən olan Udvanu-l-Mudriyyə qəbiləsinin başçısı şair, nasir, hikmət sahibi və qədim ərəblərin cəngavərlərindən olan Zu-l-Əsbai-l-Udvaninin qocalıb əldən düşən zaman hakimiyyətin oğluna ötürülməsi mərasimində söylədiyi vəsiyyəti barədə qısa bir bilgi vermişdik.