Etniklik problemi qloballaşma və miqrasiya prosesləri ilə əlaqədar xüsusi sosial əhəmiyyət əldə etmişdir. Xalqların “böyük yerdəyişməsi” etnikliyin bütün sosial və mədəni, siyasi və iqtisadi problemlərini üzə çıxardı. Müasir cəmiyyətdə etnikliyin əhəmiyyəti xüsusilə aktualdır, çünki müasir KİVn, habelə nəhəng miqrasiya axınlarının təsiri altında insan daima ona yad olan mədəniyyəti mənimsəməyin və ya onu qəbul etməməyin arasında seçim qarşısında durur. Özü də bu seçimdən növbəti nəsillərə ötürüləcək özünəməxsus mədəni təcrübə, bütövlükdə bu etnosun taleyi asılıdır. Daimi dəyişkən dünyada, qeyri-stabillik şəraitində insanlar daha davamlı dəyərlərdə, əcdadlarının dəyərlərində dəstək tapmağa meylli olurlar. Bundan başqa, dövri olaraq yaranan milli-etnik münaqişələrin baş verdiyi müasir dünyanın təhlili göstərir ki, etnilkik problemi dünya birliyində aktual olaraq qalmaqdadır.