İslam dininin prinsipləri ilə yaxından tanış olan mömin bəndələrin Uca dinimizə olan inamının nədən ibarət olduğunu çox gözəl bilirik. Çünki bu din ilə müasir elm insan vücudundakı ruh və cisim kimi bir-birini tamamlayır. Din insanları doğru yollara səsləyir, məqsədi və hədəfi məlum olan elm isə bu yolları bir məşəl kimi işıqlandırır. Din sayəsində insanın ağlı, məntiqi, zəka və iradəsi mükəmmələşir, könül dünyası ülviləşir, onun iş və hərəkətlərində ahəng, təmkin, səbr və uyğunluq nəzərə çarpır. Bəndələrinə saysız-hesabsız nemətlər verən, onları hər yerdə mühafizə edib qoruyan Uca Allahımızın sifətlərini zati və sübuti olmaqla iki yerə ayrılması. yəni onun Vucud, Qidəm, Bəqa, Vahdəniyyət, Muxaləfətun lilhavadis və Qiyəm binəfsihi kimi səlbi sifətləri, Həyat, Elm, Səmi, Basar, İradə, Qüdrət, Kəlam və Təkvin kimi subuti sifətlərinə malik olması şəksizdir.