Sosiologiya nəzəriyyələri, cəmiyyətin və ya bəzi sosial faktların elmi metodlarla araşdırılması nəticəsində əldə edilən ümumi fikirlərdir. Sosioloqlar, sosiologiyanın elm sahəsi olaraq formalaşmağa başladığı XIX əsrin ortalarından etibarən müasir dövrə qədər davam edən prosesdə, cəmiyyəti elmi baxımdan qiymətləndirmək və içtimai münasibətləri ifadə etmək üçün müxtəlif nəzəriyyələr ortaya qoymuşdurlar. Xronoloji baxımdan ələ alındığı zaman nəzəriyyələr “klassik” və “müasir” olaraq iki qrupa ayrılır. Klassik nəzəriyyələr ilə müasir nəzəriyyələr arasında bir sıra fərqliliklər mövcud olsa da, onu da qeyd etmək lazımdır ki, müasir nəzəriyyələr klassik nəzəriyyələrin ortaya qoyduğu perspektivlə inkişaf etdirilmiş və o nəzəriyyələrin atdığı təməllərə görə formalaşmışdır. Tayfun Amman müasir nəzəriyyələrdən funksionalist nəzəriyyəni “Komt, Spenser və Durkheimin atdığı təməllər üzərində, B.Malinovski ilə A.R.Radklif-Braun tərəfindən skeleti qurulan, T.Parsons tərəfindən isə divarları hörülən və R.K.Merton tərəfindən isə qüsurları ortadan qaldırılan bir bina” [1, s.396] bənzətməsi kimi qiymətləndirmişdir. Funksionalist nəzəriyyə təməldə cəmiyyəti canlı bir orqanizm kimi qəbul edən və bu orqanizmi meydana gətirən bütün hissələrin də onun canlılığını təmin etmək üçün müəyyən funksiyalar icra etdiyini iddia edən bir düşüncədir.