Tarıyel müəllimi mən 1958-ci ildən tanıyıram. O, bizdən bir il sonra Şərqşünaslıq fakültəsinin ərəb dili şöbəsinə daxil olmuşdu. Buna görə də biz o qrupun tələbələrinə “bala ərəblər” deyərdik. Tezliklə həmin qrupun tələbələri ilə bizim aramızda səmimi dostluq münasibətləri yarandı və axıra qədər davam etdi. Boş vaxtlarda, tənəffüslərdə görüşür, dərslərdən, ərəb ölkələrində baş verən hadisələrdən və məişətlə bağlı məsələlərdən söhbət edərdik. Demək lazımdır ki, Tarıyelgilin qrupunun tələbələrinin demək olar ki, hamısı “əla” qiymətlərlə oxuyurdular. Lakin çox keçmədi ki, Tarıyel onların arasından öz zəhmətkeşliyi, qavrama qabiliyyəti, istedadı və bacarığı ilə seçilməyə başladı. Bu bəstəboy, qarayanız gənc dərsdə, yataqxanada və hətta yolda da oxumaqdan əl çəkməzdi.