Qazı Bürhanəddin Əhməd türk tarixinin, ədəbiyyatının, elminin,siyasət və dövlətçiliyinin keçdiyi yolda ayrıca yer tutur. Türk düşüncə , tarixinə incə, aşiqanə, eləcə də igidlik, ərənlik motivləri ilə dolu şeirləri, yetkin dini əsərləri, parlaq dövlətçilik istedadı, fatehlik əməlinin olması ilə yerləşən Qazı Bürhanəddin milli dəyərlərin irəliləməsinə böyük yol açdı. «Anadolu bəyləri arasmda onun qədər fəal, savaşdan-savaşa getmiş bir bəy daha yoxdur. Bunun üçündür ki, müsəlman yazarlar tərəfindən «fəth atası» ləqəbi verilib... Qazı alim, adil, iti yaddaşlı, yorğunluğa, soyuq və istiyə dözümlü, sərt, çəkinməz, zövq və səfaya düşgün, şərab və saz toplantılarından çox xoşlanan, iyi ürəkli, alimlərə yaxın, həssas bir adam, bağışlayıcı, yaxşılıqsevər, nəşəli bir xarakterə sahib idi.